" ﺇﻥ ﺍﻷﻳﺎﺩﻱ ﺍﻟﺘﻲ ﻓﻲ ﻛﺘﻔﻬﺎ ﺻﻘَﺮٌ
ﻗﺘﻠﻨﻨﺎ .. ﺛﻢّ ﻟﻢ ﻳﺤﻴﻴﻦ .. ﻗﺘﻼﻧﺎ "
( ﺗﻌﺎﻟﻲ ﻭﺷﻲ ﺍﻟﻮﻃﻦ ﺩﺭﻛﺎﻥ ﻋﺴﺎﻛﺮ ﺁﺧﺮ ﺍﻟﺰﻣﻦ ﻭﺍﻃﺎﻩ
ﺗﻌﺎﻟﻲ .… ﻭﻣﺎ ﻋﻠﻲ ﻛﻴﻔﻚ ﺗﻌﺎﻟﻲ .... ﻭﺭﻳِّﺤﻲ ﺍﻟﻮﺍﻃﺔ )
ﺍﻟﺤﺎﻝ ﻭﺭﺍﻙ ﻛﻴﻔﻦ ﺗﺴﺮ
ﺑﺎﻗﻴﻠﻚ ﺇﻧﺘﻲ ﺑﻼﻙ ﻓﻲ ﺯﻳﻦ
ﻣﺎ ﺇﺗﻬﺸَّﻢ ﺇﺑﺮﻳﻖ ﺍﻟﺮﺿﺎ
ﺧﻨﺴﺖ ﻧﺴﻴﻤﺎﺕ ﺍﻟﺴﻤﺢ
ﻭﺍﻟﺒﺴﻤﺔ ﺯﻱ ﺣﺒﺔ ﻗﻤﺢ
ﻟﻔﺤﻪ ﻭﻃﻔﺮ ﻃﻴﺮﺍً ﻛﺘُﺮ
ﺃﻭﺭﺙ ﻋﺼﺎﻓﻴﺮﻱ ﺍﻟﻀﻨﺎ
ﻳﺒﺲ ﻏﻨﺎﻫﺎ ﻣﻊ ﺍﻟﻔﺠﺮ ؟؟
.… .… .…
ﻋﺎﻧﻴﺖ ﻭﺭﺍﻛﻲ ﺟﻨﺲ ﻋﻨﺎ
ﺑﻮّﻍ ﺳﻬﺎﺩﻱ ﻛﺮﻭ ﺍﻟﻨﺠﻮﻡ
ﺧﻄﻮ ﺍﻟﻤﻮﺍﻭﻳﻞ ﺇﺭﺗﻌﺶ
ﺣﺮّﺱ ﻋﺼﺎﺗﻲ ﺑﻨﺎﺕ ﻧﻌﺶ
ﺩﻭﻣﺴﺖ ﻓﻮﻕ ﺣِﺠﺮ ﺍﻟﺒﺘﻮﻝ
ﻫﻠﻮﺳﺖ ﺑﻲ ﺻﻠﺐ ﺍﻟﻤﺴﻴﺢ
ﺩﺭﻭﺵ ﺷﺮﺩﺕ ﻣﻦ ﺍﻟﻀﺮﻳﺢ
ﺷﻮﻳﻤﺖ ﺑﻲ ﻇﻠﻢ ﺍﻟﺤﺴﻴﻦ
ﺃﻭﻣﺖ ﻋﻠﻲْ ﻛﻢ ﻣﻴﻀﻨﺔ
.… .… .…
ﻭﻣﺎ ﺑﻴﻦ ﻋﻴﻮﻧﻚ ﻭﺍﻟﻮﺻﻮﻝ
ﺗﺎﻫﺖ ﺑﻲ ﻗﺎﻓﻠﺔ ﺍﻟﺤﺮﻭﻑ
ﻭﻗَّﻊ ﻃﻨﺎﺑﻴﺮ ﺍﻟﺰﻣﻦ
ﺇﻧﻄﺮﺑﻖ ﺇﻳﻘﺎﻉ ﺍﻟﻔﺼﻮﻝ
ﺣﺎﺿﺖ ﻏﻤﺎﻣﺔ ﻭﺭﺍ ﺍﻟﺠﺒﻞ
ﻃﺮﺣﺖ ﻣﻦ ﺍﻟﻨﻴﻞ ﺍﻟﺠﺮﻭﻑ
ﺷﻬﻘﺖ ﺷﻌﺎﺏ ﺇﻧﺴﺎﻧﻲ ﺧﻮﻑ
ﻣﻨﻚ ﻋﻠﻴﻜﻲ .. ﻋﻠﻰ ﺃﻱِّ ﺯﻭﻝ
ﺗﻮَّﻙ ﻧﻴﺎﻕ ﺷﻮﻗﻮ ﺍﻟﻀﻨﺎ
ﺳﺮّﺡ ﻋﺼﺎ ﺍﻟﺘﺴﻴﺎﺭ ﻗَﺒَﻞ
ﺩﺭﺏ ﺍﻟﺤﻴﺎﺓ ﺍﻟﻤﺮﻣﻮﻝ ﻓﻨﺎ
ﻳﺎ ﻭﻗﻔﺔ ﺍﻟﻮﺍﻗﻌﻴﻦ ﻫﻨﺎﻙ
ﻳﺎ ﻭﻗﻌﺔ ﺍﻟﻮﺍﻗﻔﻴﻦ ﻫﻨﺎ
ﻳﺎ ﻭﻗﻌﺔ ﺍﻟﻮﺍﻗﻔﻴﻦ ﻫﻨﺎﻙ
ﻳﺎ ﻭﻗﻔﺔ ﺍﻟﻮﺍﻗﻌﻴﻦ ﻫﻨﺎ
ﻳﺎ ﻭﻗﻔﺔ ﺍﻟﻮﺍﻗﻔﻴﻦ ﻫﻨﺎﻙ
ﻳﺎ ﻭﻗﻌﺔ ﺍﻟﻮﺍﻗﻌﻴﻦ ﻫﻨﺎ
... ...
ﻳﺎ ﻋﺎﻓﺔ ﺍﻟﻮﻃﻦ ﺍﻟﺠﺮﻳﺢ
ﺇﺷﻤﻌﻨﻰ ﻭﺻﻠﻚ ﻻ ﺩﻧﻰ
ﻭﻻ ﺁﻓﺔ ﺍﻟﺰﻣﻦ ﺍﻟﻤﺸﻴﺢ
ﻗﺪﺭﺕ ﺭﻭﻳﺤﺘﻲ ﺗﻴﻘﻨﺎ
ﻣﻦ ﺟﻴﺘﻚ ﺍﻟﻤِﻦ ﻣﺮﻗﺔ ﻣﺘﻴﻦ
ﺍﻟﺪﻫﺪﻫﻚ ..؟
ﺭﻭﺣﺘﻲ ﻭﻳﻦ ؟؟
… … …
ﻏﺮﺑﻞ ﻋﻠﻴﻚ ﻛﻞ ﺍﻟﻤﺪﺍﺋﻦ
ﺍﻟﻜﺎﻥ ﺯﻣﺎﻧﻚ ﺣﺎﻟﻪ ﺯﻳﻦ
ﻧﺎ ﺷﺪﺗﻬﺎ
ﻓﺘَّﺶ ﻧﻬﺎﺭﺍﺕ ﺍﻟﻘﺮﻯ ﺍﻟﻤﺘﻜﻴَّﺔ
ﻓﻮﻕ ﺷِﻌﺐ ﺍﻟﺼﺒﺮ
ﺳﺎﻧﺪﺗﻬﺎ …
ﻋﻠَّﻢ ﺑﻄﺎﻧﻪ ﺍﻟﺸﻴﻄﻨﺔ
ﻭﻏﻨِّﻴﺖ ﻣﻌﺎﻫﻦ ﺳﻮﺩﻧﺔ
ﻳﺎ ﺳﻮﺩﻧﺔ
ﻳﺎ ﺳﻮﺩﻧﺔ
ﻟﻤﻠﻤﺘﻬﻢ ﻭﺍﻟﺪﻧﻴﺎ ﻟﻴﻞ
ﻭﺍﻟﻘﻤﺮﺓ ﺑﺖ ﻓﺎﺗﻪ ﺍﻟﻘﻄﺮ
ﻭﺻَّﻒ ﻟﻬﻢ ﺣﺘّﺔ ﺷﻠﻴﻞ
… … …
ﺭﺩﺩ ﺣﺮﻭﻓﻦ ﺭﺩﺗﻬﺎ
ﻭﻗّﻒ ﺳﺤﺎﺑﺔ ﻣﻊ ﺍﻟﺪﻏﺶ
ﺷﻬﺪﺗﻬﺎ
ﻭﺷﻬﺪﺕ ﻣﻌﺎﻳﺎ ﻋﻠﻰ ﺍﻟﻌﺬﺍﺏ
ﺍﻟﻬﺪّﺍ ﺃﺿﻼﻉ ﺍﻟﻐﺒﺶ
ﺭﺍﻋﺪﺗﻬﺎ
ﺗﻜﻠﺖ ﺧﺪﻭﺩﻩ ﻋﻠﻰ ﺑﻜﺎﻱ
ﻻﻗﺖ ﺷﺠﻮﻥ ﺟﺎﻫﺪﺗﻬﺎ
ﻛﺎﻧﺖ ﻣﻜﺒﺮﺗﺔ ﺑﺎﻟﺸﺒﺎﺏ
ﻛﻨﺖ ﺍﻟﺘﺮﺍﺏ
ﺭﺍﻭﺩﺗﻬﺎ
ﻓﻮﻕ ﻫﺎ ﺍﻟﺴﺮﺍﺏ ﻭﺍﻋﺪﺗﻬﺎ
ﻭﻻ ﺇﻧﺘﻲ ﺟﻴﺘﻲ ﻭﻻ ﻫﻲ
ﺁﻩ ..
ﺭﻭﺣﺘﻮ ﻭﻳﻦ ؟؟
… … …
ﻳﺎ ﺯﻳﻦ ﻣﺮﻗﺘﻲ ﻣﺸﻴﺘﻲ ﻭﻳﻦ
ﻛﻞ ﺍﻟﺒﻨﺎﺕ ﺟﻮ ﻣﻦ ﺍﻟﻤﻠﻲ
ﺣﺸَّﻦ ﺑﻜﻦ
ﺷﺪّﻥ ﺣﻜﻦ
ﻭﺃﺯﻳﺎﺭﻧﺎ ﻭﺍﻟﻤﺮﺣﺎﺕ ﺧﻠﻲ
ﻳﺎ ﺇﻧﺘﻲ ﻳﺎ ﻣﺮﺓ ﺍﻟﻌﺪﻝ
ﻣﺎﻙ ﻓﻲ ﺻﻌﻴﺪﺍً ﺗﺘﺮﺟﻲ
ﺭﻭﺣﺘﻲ ﻭﻳﻦ ..؟
ﻗﻮﻟﻴﻠﻨﺎ ﺑﺲ ﻳﺎ ﺇﻧﺘﻲ
ﺷﺎﻥ ﻧﺤﺮﺍﻙ ﺗﺠﻲ
ﺟﻴﺔ ﺍﻟﻤﻬﻴﺮﺓ ﻭﺗﺼﻬﻠﻲ
ﻟﻮ ﻓﻴﻨﺎ ﺃﻃﻠﻌﻲ ﻣﻨﻨﺎ
ﺃﻭ ﺑﺮّﺓ ﺃﺩﺧﻠﻲ .. ﺃﺩﺧﻠﻲ
… … …
ﻏﻨﻴﺘﻚ ﺍﻟﺒﺎﺭﺡ ﺑﺮﺍﻱ
ﺇﻧﺼﻠﺒﻄﻮﺍ ﺍﻟﺘﺎﻧﻴﻦ ﻏﻨﺎﻱ
ﻭﺍﻟﻠﻴﻠﻲ ﺑﺘﻮﺍﺗﺎﻙ ﺷﻌﺮ
ﺩﻭﻧﻮ ﺇﻧﻌﺘﺎﻗﻚ ﺃﻭ ﻓﻨﺎﻱ
ﻫﻴﺎ ﻳﺎ ﻣﻐﻨﻴﻦ ﺍﻟﺸﻌﺮ
ﺿﺪ ﻫﺎ ﺍﻟﺰﻣﺎﻥ ﻭﻃﺒﻨﺠﺘﻮ
ﺷﻌﺮ .. ﺍﻟﺸﻌﺮ
ﺷﻌﺮ ..
ﺃﻳﻮﺍ ..
ﻳﻼّ ..
ﻋﻠﻴﻨﺎ ..
ﺟﺎﻱ ..
ﻭﻧﻜﺮ ﺍﻟﻤﻐﻨﻲ ﻛﻤﻨﺠﺘﻮ
ﺃ .. ﻧﻜﺮ ﺍﻟﻤﻐﻨﻲ ..
ﻛﻤﻨﺠﺘﻮ ؟؟ !
... ...
ﻧﺎﺩﻭﺱ ﻳﺎ ..,.
ﻓﺠﺮ ﺍﻟﻘﺼﺎﺋﺪ ﻳﻨﺪﻟﻖ
ﻣﺎ ﺣﻚَّ ﺟﻠﺪﻙ ﻣﺜﻞ ﻇﻔﺮﻙ
ﻓﺎﻧﻄﻠﻖ ..
ﺇﻧﺎ ﺷﺮﺣﻨﺎ ﻟﻚ ﺻﺪﺭﻙ
ﺃﻭ ﺷﺮﺧﻨﺎﻩ
ﻓﺎﻧﻌﺘﻖ
ﻳﺎ ﺃﻧﺖ ﻳﺎ ﻛﻞ ﺍﻟﺬﻳﻦ
ﻷﺟﻞ ﺧﺎﻃﺮﻫﻢ ﻃﻬﻮﺕُ
ﻏﺪﺍﺓ ﻋﻘﻢ
ﺯﻫﻮﺭ ﻛﻠﻤﻲ
ﻟﺘﻨﻔﺘﻖ ﻏﻀﺒﺎً ﻳﺆﺭﻕ ﻣﻮﻗﺪﻳﻪ
ﻛﻮﺭﺗﻪ ﺭﺟﻤﺎً ﻟﻜﻞٍ ﻣﻦ -:
ﺗﺨﺎﺫﻝ
ﺃﻭ ﺗﻨﺎﺯﻝ
ﺃﻭ ﺗﻬﺎﻭﻥ
ﺃﻭ ﺗﺨﺎﻭﻥ
ﺃﻭ ﺗﻌﺎﻭﻥ ﺿﺪ ﻓﺘﺤﻚ ﺃﻭ ﺃﺗﺎﻧﻲ ﻳﺴﺘﺮﻕ
… … …
ﺗَﺮﺑﺖ ﻳﺪﺍﻙ ..
ﺗﺮﺑﺖ ﻳﺪﺍﻙ ..
ﺗﺒّﺖ ﻳﺪﺍ ﻛﻞِ ﺍﻟﺬﻳﻦ
ﺗﻐﺎﻣﺰﻭﺍ
ﻭﺗﻼﻣﺰﻭﺍ
ﻭﺗﻬﺎﻣﺰﻭﺍ
ﻭﺗﻘﺬﺫﻭﺍ
ﻓﺘﻠﺬﺫﻭﺍ
ﻣﻦ ﻓﻴﻪ ﺟﺮﺣﻚ ﻳﺎ ﻭﻃﻦ ؟
ﻧﺎﺩﻭﺱ ﺁﻩ
ﻧﺎﺩﻭﺱ ﻳﺎ ..
... ... ...
ﺃﺻﺒﺤﻨﺎ ﻳﺎ ﻧﺎﺩﻭﺱ
ﻭﺃﻣﺴﻴﻨﺎ ﺑﻴﻚ ﻳﺎ ﺃﻡ
ﺃﻣﺴﻴﻨﺎ ﻳﺎ ﻧﺎﺩﻭﺱ
ﻭﺃﺻﺒﺤﻨﺎ ﺑﻴﻚ ﻳﺎ ﺃﻡ
ﻳﺎ ﺳﻮﺳﺔ ﺿﺪ ﺍﻟﺴﻮﺱ
ﻗﻠﺒﺎً ﺑﻼﻛﻲ ﻳﻀﻢ
ﻟﻴﻞ ﺍﻟﻀﻴﺎﻉ ﻣﻬﻮﻭﺱ
ﻳﺤﻠﻢ ﻫﻮﺍﻛﻲ ﻳﺆﻡ
ﺑﻌﺪ ﺍﻟﺤﺼﺎﺩ ﺍﻟﺮﻭﺱ
ﻋﺎﻟﻢ ﻧﺪﺍﻫﻮ ﻳﻌﻢ
ﺧﺘﻴﺖ ﻫﻮﺍﻙ ﻓﺎﻧﻮﺱ
ﺑﻘّﺎﺑﻲ ﺷﻠﺘﻮ ﻭﺣﻢ
ﺟﻴﺖ ﺍﻟﻤﺪﻥ ﺑﺎﺧﻮﺱ
ﻻﻗﻴﺘﻮ ﺟﺎﻟﺐ ﺍﻟﺴﻢ
ﺭﺍﺷﺢ ﻫﺠﻴﺮ ﺍﻟﺒﻮﺱ
ﻭﻛﻞ ﺍﻟﻮﺟﻮﻩ ﺩﻡ ﺩﻡ
… … … …
ﻛﻞ ﺍﻟﺨﻠﻮﻕ ﺩﻣﺪﻡ
ﻛﻮﺭﻛﺖَ ..
ﻳﺎ ﻧﺎﺩﻭﺱ ..
ﺃﻡ ﺍﻟﻐﺒﺶ ﻳﺎ ﺃﻡ
ﻳﺎ ﻧﺨﻞِ ﻳﺎ ﺃﺑﻨﻮﺱ
ﻳﺎ ﺳﻤﺒﺎ .. ﻳﺎ ﺗﻤﺘﻢ
ﻳﺎ ﺍﻟﺒﻴﻚ ﻏﻨﺎﻱ ﻣﺤﺮﻭﺱ
ﺩﺧﺮﻱ ﺍﻟﻐﻼﺑﺔ ﻫﻠﻢ
ﺩﻫﻤﻨﻲ ﻛﻢ ﻣﺠﺮﻭﺱ
ﻋﻜّﻤﺖَ ﻓﻴﻲ ﻭﻗﻢ
... ... ...
ﺣﻤَّﺮﺕ ﻓﻲ ﺍﻟﺴﺤﺐ ﺍﻟﻤﻜﺒﺮﺗﺔ
ﻳﺎ ﺩﺧﺎﻥ ..
ﻳﺎ ﺭﻳﺤﻪ ..
ﻳﺎ ﻗﻮّﺍﺩﻩ ﻟﻠﺒﺤﺮ ﺍﻟﻤﺨﻨﺚ
ﻭﺍﻟﻌﺴﺎﻛﺮ ﻭﺍﻟﻤﻠﺲ
ﻣﺎ ﺗﺨﺘﺸﻲ .
ﺑﻴّﻮﺿﺔ ﻳﺎ ﻣﺎﺣﻖ ﺍﻟﺨﺮﻳﻒ
ﻣﺎ ﻃﻨﺒﺮﺕ ﻋﺮﺑﺎﻧﻪ ﺷﻲ
ﻣﺴﺘﻨﻲ ﻓﻲ ﺍﻟﺰﻣﻦ ﺍﻟﻨﺰﻳﻒ
ﺍﻟﻘﺎﻝ ﺑﺠﻲ ﻭﻓﺎﺕ ﺑﻲ ﻭﺷﻲ
ﻣﺸﺖ ﺍﻟﻨﻬﺎﺭﺍﺕ ﺑﺎﻟﺼﺒﺮ
ﺃﺑﺖ ﺍﻟﻤﻐﺎﺭﺏ ﺗﺘﻤﺸﻲ
ﺭﺷﺖ ﺍﻟﻤﻐﺎﺭﺏ ﺑﺎﻟﺼﺒﺮ
ﺃﺑﺖ ﺍﻟﻌﺸﻴّﺎﺕ ﺗﺘﺮﺷﻲ
ﺩﻗﺴﺖ ﺳﻮﺍﻗﻲ ﺍﻟﻤﺘﻌﺒَﻴﻦ
ﻛﺎﻳﺴﺎﻟﻪ ﻓﻴﻬﺎ ﻋﻘﺎﺏ ﻋﺸﻲ .؟؟ !
.… .… .…
ﺑﻴﻮﺿﺔ ﺁﻩ ..
ﺃﻭّﺍﻩ .. ﻟﻮ ﺍﻟﻜﻠﻤﺎﺕ ﺣﺼﻰ
ﻗﺎﻟﺘﻠﻲ ﺍﻟﻠﻪ ﺃﻗﺮﺏ ﻓﺮﺝ
ﺃﻭّﺍﻩ .. ﻟﻮ ﺍﻟﻜﻠﻤﺎﺕ ﻟﻬﺐ
ﻧﺮﺟﻢ ﺑﻮ ﻭﺵ ﺯﻣﻦ ﺍﻟﻘﺴﺎ
ﻗﺎﻟﺘﻠﻲ ﻓِﻄﻦ ﺍﻟﻠﻴﻞ ﻭﻫﺞ
ﻫﺪّﺍﻡ ﺃﻣﺎﻥ ﺍﻟﻨﺎﺱ ﻧﺴﻰ .
ﺩﻧﻘﺮﺕ ﻟﻸﺭﺽ ﺍﻟﻤﺴﺮﺑﻠﺔ ﺑﺎﻟﺴﺮﺍﺏ
ﻓﺮْﻧﺒﺖَ ﺑﻲ ﻏﻠﺒﻲ ﺍﻟﻌﻮﺝ
ﻓﻘﺪﺕ ﺃﻳﺎﺩﻱَّ ﺍﻟﻌﺼﺎ
ﺷﺪِّﻳﺖ ﺣﺰﺍﻣﺎﺕ ﺍﻟﺠﻠَﺪ
ﻫﺮﻭﻟﺖ ﺗﺎﻻ ﺿﺮﺍ ﺍﻟﻮﺻﺎ ..
ﻛﻮﺭﻛﺘﻲ ﺃﺭﺟﻊ ﻳﺎ ﻭﻟﺪ
ﺻُﺪ ..
ﺻُﺪ ..
ﺻُﺪ ..
ﺃﺭﺟﻊ ﻳﺎ ﻭﻟﺪ
ﻃﻮﺭﻳﺔْ ﺃﺑﻮﻛﺎ ﺗﺮﺍﻫﺎ ﺩﻱ
ﻋﺎﻧﺪ ﻛﻮﺍﺭﻳﻜﻚ ﻣﺸﻴﺖ
ﻃﻮﺭﻳﺔْ ﺃﺑﻮﻳﺎ .. ﺗﺮﺍﻫﺎ ﺩﻳﻚ
ﻟﻔﺤﻮﻫﺎ ﻻﻣﻦ ﻗﺎﻡ ﻳﺼﻠِّﻲ
ﺧﺼﺎﺓ ﺿﻜﺎﺭﺍﺕ ﺍﻟﻐﻤﺎﻡ
ﻣﻐﺮﺏ ﺻﺒﺎﺡ ﻟﻴﻠﺔ ﺩﺧﻠﺘﻮ
ﻋﻠﻰ ﺍﻟﺒﻠﺪ.
… … …
ﺣﺮّﻕ ﻋﺮﻭﻕ ﺣﻠﻔﻰ ﺍﻟﻜﻼﻡ
ﻋﻄﺸﺎﻥ ﺳﻘﻴﺖ ﻋِﺮْﻕَ ﺍﻟﺸﺪﻳﺮﺓ
ﻣﻦ ﺍﻟﻤﻄﻴﺮﺓ ﺍﻟﻔﻲِّ
.. ﻛﺎﻥ ..
ﺣِﺲْ ﺍﻟﻌﺴﺎﻛﺮ .. ﻻ ﻭﺭﺍ ..
ﻗﺎﻟﺘﻠﻲ ﺃﺟﺮ ..
ﺃﺟِﺮْ ..
ﺃﺟِﺮ ..
ﺃﺟِﺮْ ..؟
ﻗﺎﻟﺘﻠﻲ ﺃﺟﺮ ..
ﺷﺪﺭﺓ ﻏﻨﺎﻳﺎ ..
ﺟﺮﻳﻚ ﺿﺮﺍﻳﺎ
ﺟﺮﻳﻚ ﺿﺮﺍﻳﺎ
ﺟﺮﻳﻚ ﺿﺮﺍ ..؟ !؟
ﻗﺒﻞ ﺍﻟﻌﺴﺎﻛﺮ ، ﻣﺎ ﺗﺼﻞ ؟
ﻗﺒﻞ ﺍﻟﺪﺭﺍﺩﺭ ﻣﺎ ﺗﺒﻴﻦ ؟
ﻭﻛﺎﻧﻮﺍ ﺍﻟﻌﻮﺍﺭﺽ ﻓﻲ ﻭﺷﻴﻲ !؟
… … …
ﻗﻠﺖ ﺃﻗﻮﻝ ﻭﻗﻊ !
ﻗﻠﺖ ﺃﻗﻮﻝ ﻭﻗﻊ ؟
ﻃﻴﻨﺔ ﺍﻟﺠﺪﺍﻭﻝ ، ﻣﺎﻫﺎ ﺯﻱ ﻃﻴﻨﺔ ﺟﺴﺎﺭﺗﻚ
ﻳﺎ ﺑﻠﺪ ﻭﺍﻟﻜﻞِّ ﻃﻴﻦ !
ﻳﺎ ﻧﺒُّﻮﺕ ..
ﺩﻗَّﺔ ﺗﻔﻮﺕ
ﻭﻻ ﺣﻠﻢِ ﻳﻤﻮﺕ
… … …
ﺍﻟﻨﻨﺪﻕ ..
ﻧﻨﺪﻕ ..
ﻧﻨﺪﻕ ..
ﻭﻳﻔﻀﻞ ﺑﺎﻗﻲ ﻟﻬﻴﺐ ﺍﻟﺤﻖ
ﺣﻖ ﺍﻟﻨﺎﺱ ﻳﻨﺘﻞ ﻓﻲ ﺍﻟﺤﻠﻖ
ﺃﻭ ﻳﺘﻌﺎﺭﺽ ﺷﻮﻛﺔ ﺣﻮﺕ
ﻭﺳﻢ ﺍﻟﻐﺎﺻﺐ ..
ﻭﻳﺠﻲ ﻛﺎﺑﺮﻭﺕ ؟
ﻳﺎ ﻃﺎﻏﻮﺕ
ﺍﻟﻴﺠﻲ ﻛﺎﺑﺮﻭﺕ
ﻳﺎ ﺟﺒﺮﻭﺕ
ﺍﻟﻴﺠﻲ ﻛﺎﺑﺮﻭﺕ
ﻳﺎ ﻛﻬﻨﻮﺕ
ﺍﻟﻴﺠﻲ ﻛﺎﺑﺮﻭﺕ ؟
ﻳﺎ ﻛﺎﺑﺮﻭﺕ ؟؟
ﻛﺎﺑﺮﻭﺕ ؟؟
ﻛﺎﺑﺮﻭﺕ .؟؟
… … …
ﻛﺎﺑﺮﻭﺕ ﻋﺸﻢ ﻭﻃﻦ ﺍﻟﻐﻼﺑﺔ
ﺍﻟﺤﺎﻝ ﺑﻼﻙ ﺗﺐَّ ﻣﺎﺏ ﺗﺴﺮ
ﻣﺎ ﺑﺎﻥ ﺻﺒﺎﺡ ..
ﺃﻭ ﻋﺴﻌﺴﺖ ﻗِﺪّﺍﻣﻨﺎ ﻟﻴﻠﺔ
ﺗﺰﻳﺪﻧﺎ ﺿُﺮ
ﺃﻭﺗﺎﺭﻧﺎ ﻳﺎ ﺁﺧﺮ ﺍﻟﻐﻨﺎ
ﺣﺮﺩﺍﻥ ﻋﺸﻴَّﺎﺗﻪ ﺍﻟﻨﻐﻢ
ﻓﺮﻏﺖ ﻣﺠﺎﻟﺴﻨﺎ ﺍﻟﺒﻼﻙ
ﻋﻨﻜﺐ ﻋﻠﻰ ﺃﺑﻮﺍﺑﻪ ﺍﻟﺴﺄﻡ
… … …
ﺃﺻﺪﻕ ..
ﻛﻔﺎﻧﺎ ﻛﻀﺐ ﺭﻳﺎﺡ
ﻭﻫﻮﺱ ﺭﻋﻮﺩ
ﻭﺿﺤﻚ ﺑﺮﻕ !!!
ﺍﻟﻌﺸﺐِ ﻣﺎﻟﻲ ﺣﺸﺎ ﺍﻷﺭﺍﺿﻲ
ﺣﻮﺍﻫﻮ ﻟﻤّﺎ ﺍﻟﻮﺵ ﺣِﺮﻕ ..
ﺍﻟﻌﺸﺐ ﺣﻲْ ..
ﺑﺲ ﻛﻴﻒ ﺗﺼﺐ
ﻳﻤﻼﺑﻚ ﺍﻟﻤﻠﻴﻮﻥ ﻋﺮِﻕ
… … …
ﻛﺪّﺑﻨﺎ ﻓﻲ ﺍﻟﻜﺮﻭ
ﻓﻲ ﺭﺟﺎﻙ
ﺳﺎﻭﻳﻦ ﻋﺼﺎ ﺍﻷﺷﻮﺍﻕ ﻣﺮﻕ
ﻋﺮﺑﺎﻥ ..
ﻭﻧﻮﺑﺎ ..
ﻧﻬﺎﺗﻲ ﺑﻴﻚ
ﻭﺍﻟﺰﻧﺞ
ﻧﺘﻤﻨﺎﻙ ﻋﺘِﻖ
ﻣﺎ ﻟﺴَّﻪ ﺑﻴﻦ ﺍﻟﻨﺎﺱ ﻓﺮﻕ ؟ !
ﻟﺴَّﻊ ﻓﻲ ﻧﺨّﺎﺳﺔ ﻭﻓﻲ ﺭﻕ
ﻭﺭﺍ ﻳﺎ ﻭﺟﻊ
ﻫﻴﺎ ﻳﺎ ﻃﻠﻖ
ﻃﻠﻖ
ﻃﻠﻖ
… … …
ﺻُﺪْ ﻟﻲ ﻣﻼﻣﺤﻚ ﻳﺎ ﺣﺮﺍﺯ
ﺭﻳﺢ ﺍﻟﻌﻮﺍﺭﺽ ﻏﺮَّﺑﺖ
ﻓﺮﺗﻚ ﺿﻔﺎﺋﺮﻙ ﻓﻲ ﺍﻟﺮﺯﺍﺯ
ﺟﻴﺔْ ﺍﻟﻌﺼﺎﻓﻴﺮ ﻗﺮَّﺑﺖ
ﻻﻗﻴﺘﻪ ﻓﻲ ﻏﺎﺑﺔ ﻣﺪﻳﻦ
ﻭﺻَّﺖ ﺷﺘﻴﻠﺔً ﺣﺒﺤﺒﺖ
ﻋﻠﻰ ﻋﺶ ﺻﻐﺎﺭﺍ
ﺍﻟﺪﻭﺏ ﺣﺒﺖ
ﻣﺎ ﻭﻗَّﻔﻪ ﺍﻟﻠﻴﻞ ، ﻻ ﺍﻟﻬﺠﻴﺮ
ﻛﻢ ﺟﻒَّ ﺭﻳﻘﻪ ﻭﻭﺗﺒﺖ
ﻻﻗﺖ ﻣﻦ ﺍﻟﻌﻨﺖ ﺍﻟﻜﺘﻴﺮ
ﻣﻠﺖ ﺍﻟﻔﻴﺎﻓﻲ ﺃﺣﺪٌ
ﺃﺣﺪْ
ﻓﺎﻳﺪﺓْ ﺟﻨﺎﺣﻲ ﺑﻼ ﺃﻃﻴﺮ
ﺍﻟﻤﻮﺕ ﻭﻻ ﺍﻟﻌﻴﺶ ﺍﻟﻨﻜﺪ
ﻧﺘﻒ ﺍﻟﺨﻼﻳﺎ ﻭﻻ ﺍﻟﻀﻤﻴﺮ
ﺍﻟﻤﻮﺕ ﻭﻻ ﺍﻟﻌﻴﺸﻲ ﺍﻟﻨﻜﺪ
… … …
ﻳﺎ ﻧﻴﻞ ﻣﺪﺩ
ﻳﺎ ﻏﻴﺚ ﻣﺪﺩ
ﻳﺎ ﻏﻴﺚ ﻣﺪﺩ
ﻣﺪﺩ
ﻣﺪﺩ
.. … ..
ﻧﺪِّﻱ ﺩﻣﺮ ﻭﻧﺎﺩﻭﺱ ﻭﻧﺸﻮﻗﺎ
ﺧﻞ ﺍﻟﻨﺎﺱ ﺍﻟﺼﺒﺤﺖ ﻭﻳﻮﻡ
ﻣﻦ ﺣﻴّﺎﺕ ﺍﻟﺨﻮﺭ ﻣﻠﺪﻭﻏﺔ
ﺧﻞ ﺍﻟﺼﻮﺕ ﺍﻟﻜﺒﺘﻮ ﺍﻟﺠﻮﻉ
ﻳﻠﻘﻰ ﺑﺮﺍﺣﻮ ﻳﻀﻮﻉ ، ﻭﻳﻀﻮﻉ
ﺍﻟﺼﻮﺕ ﺍﻟﻌﺎﻟﻲ ﻳﺎ ﺻﻮﺕ ﺍﻟﻨﺎﺱ
ﺍﻟﺘﺤﺖ ﺍﻟﻮﺍﻃﻲ ﺍﻟﻤﺎﻣﺴﻤﻮﻉ
ﺧﻠّﻮ ﻳﻬﺰ ﺍﻟﺪﻧﻴﺎ ﻣﻮﺍﻛﺐ
ﻣﻨّﻮ ﻳﺴﻞ ﺧﺎﺫﻭﻗﺎً ﺭﺍﻛﺐ
ﻳﺎ ﻣﻘﻄﻮﻉ ﻓﻲ ﺍﻟﺨﻼ ﺩﻭﻥ ﺯﺍﺩ
ﻭﺍﻝ ﻟﻠﻴﻠﻲ ﻫﻨﺎﻙ ﻓﻲ ﺑﻮﻏﺎ
ﺟﺎﺀ ﺍﻟﺤﻖُّ ﻭﺯﻫﻖ ﺍﻟﺒﺎﻃﻞ
ﺇﻥَّ ﺍﻟﺒﺎﻃﻞَ ﻛﺎﻥ ﺯﻫﻮﻗﺎ
… … …
ﺇﻥ ﻃﺮﺕ ﻳﺎ ﺍﻟﺰﻣﻦ ﺍﻟﺮﻣﺎﺩ
ﻋﺮﺟﻮﻧﺔ ﺍﻟﺸﻬﺮ ﺍﻟﻨﺪﻱ
ﺗﺮﺟﻊ ﺑﻬﺎ ﺃﻓﺮﺍﺡ ﺍﻟﺤﺼﺎﺩ
ﻛﺎﺑﺮﻭﺕ ﻳﻬﺐ ﻟﻲ ﻫﺒَّﻬﺎ
ﻛﺎﺑﺮﻭﺕ ﻧﺒﻊ ﻛﻞ ﺍﻟﺸﻬﻮﺭ
ﻛﺎﺑﺮﻭﺕ ﻣﺴﺎﺭﻩ ﻣﺼﺒّﻬﺎ
.… .… .…
ﺩﺧﺮﻱ ﺍﻟﻐﺒﺶ ﻛﺎﺑﺮﻭﺕ
ﺳﻴﻄﺎﻧﻮ ﻓﻮﻕ ﺍﻟﻈﻠﻢ
ﻣﺮﺗﻖ ﻳﺼﺪ ﺍﻟﻤﻮﺕ
ﻣﻦ ﺗﺎﻻ ﻏﺮﺱ ﺍﻟﺤﻠﻢ
ﺯﻏﺮﻭﺩ ﻳﺒﻖ ﻣﻦ ﺑﻴﺖ
ﺗﺤﻀﻦ ﺻﺪﺍﻫﻮ ﺑﻴﻮﺕ
ﺗﻠﻬﺞ ﺑﻮ ﺟﻴﺪﻥ ﺟﻴﺖ
ﻓﺎﺭﺱ ﺃﺟﻤﻞ ﺍﻟﺒﻨُّﻮﺕ
… … …
ﺃﺧﺘﺎﻫﺎ ﻳﺎ ﻛﻞ ﺍﻟﻨﻜﺪ
ﻧﺎﺩﻭﺱ ﻣﺤﺼَّﻨﺔ ﺑﺎﻟﺘﺮﺍﺏ
ﻭﺃﻃﻔﺎﻟﻨﺎ
ﻭﺍﻟﺤﻠﻢ
ﺍﻟﻤﻄﺮ
ﻣﻦ ﻛﻞ ﺷﺮ
.… .…
ﺗﺨﺘﺎﻫﺎ ﻣﺎ ﻛﺎﺑﺮﻭﺕ ﺳﻤﻊ
ﺑﻮﺻﻞ ﺑﺸﺎﺭﺓ ﺃﺟﻤﻞ ﺧﺒﺮ
ﻳﻮﺻﻞ ﻣﻦ ﺍﻟﺘﻤﺮ ﺍﻟﻌﻮﻝ
ﻣﻦ ﺳﻜّﺔ ﺍﻟﺠﺪﺏ ﺍﻟﺪﺣﺎﺑﻪ
ﺍﻟﻤﺘﻌَﺒﻴﻦ
ﻣﻦ ﻓﺠَّﺔ ﺍﻟﻔﺠﻊ ﺍﻟﻘﻼﺑﻪ
ﺍﻟﻤﺴﻐَﺒﻴﻦ
ﻣﻦ ﺟﻴﻬﺔ ﺍﻟﻐﺒﻦ ﺍﻟﺼﻼﺑﻪ
ﺍﻟﻤﺘﺮﺑﻴﻦ
ﻧﻔﺲ ﺍﻟﺪﺭﻭﺏ
ﺍﻟﺠﺎﺑﻪ ﻛﻞ ﺧﺎﺫﻭﻕ ﺭﻛﺐ
ﻓِﻄﻦ ﺍﻟﻐﻼﺑﺔ ﺍﻟﻜﻞ ﻣﺮَّﺓ
ﻣﻤﻘﻠﺒﻴﻦ
ﺗﻮﺻﻞ ﺑﻮ ..
ﻣﺎﺏ ﻳﺠﻲ ﻣﻦ ﺑﺨﻮﺭ
ﻣﺎﺑﺠﻴﺒﻮ ﺧﻮﺭ
ﻳﺠﻲ ﻣﻦ ﻣﺴﺎﻣﺎﺕ ﺍﻟﺪﻏﺶ
ﺟﻴْﺔ ﺍﻟﻤﻄﻮﺭ ﺍﻟﻤﺮﺳَﻠﻴﻦ
ﻣﻦ ﺑﻴﻦ ﻣﻌﺎﻧﺎﺓ ﺍﻟﻐﺒﺶ
ﻳﻤﺮﻕ ﻛﻤﺎ ﺍﻟﻔﺘﺢ ﺍﻟﻤﺒﻴﻦ
ﻣﺎﺑﺠﻴﺒﻮ ﺧﻮﺭ
ﻣﺎﺑﺠﻴﺒﻮ ﺧﻮﺭ
.… .… .…
ﻳﺎ ..
ﺧﻮﺭ ﻋُﻤَﺮ ﺳﻴﻠﻚ
ﻛﺴَّﺮ ﺩﻳﺎﺭ ﺃﻫﻠﻲ
ﻃﻔَّﺮﻧﻲ ﺭﻳﺢ ﻟﻴﻠﻚ
ﻗﺒّﺎﻝ ﻃﻴﻮﺭ ﺟﻬﻠﻲ
ﻋﻠﻘﺖ ﻏﻨﺎﻱ ﺧﻴﻠﻚ
ﻭﺃﻭﺭﺛﺘﻨﻲ ﺍﻟﺼﻬﻠﻲ
ﻭﻳﻦ ﺍﻟﻐﺒﺶ ﺩﻳﻠﻚ
ﻭﺻُّﻮﻧﻲ ﺑﺎﻟﻤﻬﻠﻲ
ﻗﺎﻟﻮﺍ ﻟِﻲ ﺷﺪْ ﺣﻴﻠﻚ
ﺯﻱ ﻗﻤﺮﺓ ﻓﻲ ﺍﻟﺴﻬﻠﻲ
.… .… .…
ﻳﺎ ..
ﻗﻤﺮﺓ
ﻳﺎ ..
ﻧﺎﺩﻭﺱ ﺃﺑﻰ
ﺷﻮﻓﻲ ﺍﻟﻤﺸﺎﻧﻖ
ﻭﺍﻟﺴﺠﻮﻥ
ﺷﺎﻑ ﺍﻟﻤﺪﺍﺭﺱ
ﻭﺍﻟﻔﺮﺡ
ﺷﺎﻑ ﺍﻟﻤﺼﺎﻧﻊ ﻭﺇﻧﺸﺮﺡ
ﻣﺴﺮﺡ
ﺟﻨﺎﺋﻦ
ﺃﻏﺎﻧﻲ ﻋﺰ
ﺻﻔّﺖ ﻋﻜﺮ ﻧﻬﺮ ﺍﻟﻌﻴﻮﻥ
ﻓﻀﺤﺖ ﻓﺤﻴﺢ
ﻟﻴﻞ ﺍﻟﻤﺠﻮﻥ
ﻋﺎﻓﻲ ﻭﻣﺤﺒَّﺔ ﻓﻲ ﻛﻞ ﺯﻭﻝ
ﺇﻧﺴﺎﻥ ﺷﺪﻳﺪ
ﻓﻲ ﻭﻃﻦ ﺟﺪﻳﺪ
ﻭﺩﺭﻭﺏ ﺗﻮﺻِّﻞ ﻛﻞ ﺯﻭﻝ
ﻟﻲ ﺯﻭﻟﻮ ﻭﺍﻷﻳﺎﻡ ﺣﻨﻮﻥ
ﻻ ﺳﻴﻞ ﺩﺭﺍﺩﺭ
ﻻ ﺳﺠﻮﻥ
ﻻ ﻟﻴﻞ ﻋﺴﺎﻛﺮ
ﻻ ﻣﺠﻮﻥ
ﻻ ﻭﻳﻞ ﻣﺴﺎﺧﺮ
ﻻ ﺩﻗﻮﻥ ؟؟؟
… .… .…
ﺭﻛَّﺔ ﻋﺪﺍﻟﺔ ﻋﻠﻰ ﻓﺮﻭﻉ
ﺟﺴﺪ ﺍﻟﺒﻠﺪ
ﻃﻔْﺮﺓْ ﻏﺒﻴﻨﺔ ﻣﻦ ﺍﻟﻌﻴﻮﻥ ﺍﻟﻤﺘﻌَﺒﺔ
ﻭﻣﻨﻔﻴﺔ ﻓﻲ ﺍﻟﺰﻣﻦ ﺍﻟﺼﻌﺐ
ﻣﻨﺴﻴﺔ ﻓﻮﻕ ﺁﻩ ﻣﺘَّﻜِﻲ
ﺷﻮﻑ ﺍﻟﻘﺼﺎﺋﺪ
ﺿﻤَّﺔ ﺃﺑﻰ
ﺃﺑﻰ ﺿﻤّﺔ
ﻳﺎ ﻧﺎﺩﻭﺱ ﺃﺑﻰ
ﺃﺑﻰ
ﺃﺑَﻰ
ﺃﺑﻰ ﺿُﻤَّﺔ ﺃﺑﻰ
ﺃﺑﻰ ﺿﻤَّﺔ ..
ﺇﻻّ ..ﺃﻛَّﺎﻥ ﺗﺠﻲ
ﻭﺗﺠﻲ ﻳﺎ ﺍﻟﺒِﺬﻛﺮِﻙ
ﺗﻄﻤﺌﻦ ﻛﻞ ﺍﻟﻘﻠﻮﺏ ﺍﻟﻤﺮﻋَﺒﺔ
ﻭﺍﻷﻣﺮُ ﻳﻮﻣﺌﺬٍ .. ﻟَﻚ